慢速粤语听力：如何才能学好粤语？

经常有人问我，

点样先可以学好广东话啊？

我觉得最好嘅方法，

就系养成一个每日学广东话嘅习惯。

呢个习惯唔会令你喺一个月之内实现从入门到流利交流嘅水平。

但系如果你坚持每日学十分钟粤拼，

咁一个月之后学识粤拼系好有可能嘅。

如果你每日坚持听十分钟广东话，

咁一年之后，你就听咗3650分钟，

一部电影一般系90分钟，

咁就等于睇咗40.5部电影。

如果你可以坚持每日投入十分钟学广东话，

我相信一年之后，

你嘅广东话肯定会有好大嘅进步。

就算你讲得唔够好，

你嘅听力都肯定会突飞猛进。

学好广东话需要时间同坚持。

下面我会讲下点解我觉得养成学广东话嘅习惯系学广东话最好嘅方法。

如果你有兴趣就继续听落去啦。

有好多人忽然好想学广东话，

就会订立一个远大嘅目标，

例如三个月从入门到精通广东话，

跟住一个月之后，

好可能会变成从入门到放弃学广东话。

其实相比于订立学习广东话嘅目标，

养成学广东话嘅习惯更加重要。

养成习惯同制定目标有乜嘢唔同？

制定目标指嘅系希望自己喺一个时间点能够达到指定嘅水平，

目标在乎嘅系进步嘅速度，

所以达成目标嘅过程有压力，

而且达成目标需要外在驱动力。

喺达成目标嘅过程中，

肯定会遇到各种各样嘅障碍，

从而导致冇办法达成目标，

会令人产生沮丧嘅感觉，

呢个就系点解好多人放弃目标嘅原因。

而且目标容易令人自满。

研究表明，

大脑会混淆目标同成就，

尤其系当一个人向其他人宣布自己嘅目标嗰时，

佢会觉得自己获得咗达成目标嘅满足感，

从而抑制达成目标嘅驱动力。

而养成习惯系指喺一个固定嘅时间点固定做同一件事，

养成习惯嘅好处系，

无论进步得快定系慢，

肯定都会每日投入时间去学。

正所谓，量变会导致质变。

虽然有啲人学得快，

有啲人学得慢，

但系有一样嘅系确定嘅，

只要你每日投入时间去学，

时间一长，

你嘅广东话肯定会俾之前好。

相对于目标，

习惯可以令一件事嘅达成变得简单。

研究表明，

大脑系会俾习惯影响嘅，

习惯一旦养成，

就会产生惯性，

会令你嘅大脑不顾一切咁样去做嘢，

会令你产生唔做嘅话就觉得唔舒服嘅感觉。

所以习惯系可以自动运行嘅。

习惯仲可以令你喺不知不觉中超越目标。

如果你养成咗每日学十分钟广东话嘅习惯，

可能有一日你心情好好，

跟住你就学咗半个钟头，

如果你耐唔耐咁做嘅话，

肯定可以喺不知不觉中学到更加多嘢。

听完呢啲之后，

你可能会有一个问题，

咁我应该点样用呢十分钟学广东话啊？

我之前睇过一个TED Talk，

呢个TED Talk研究咗识讲多种语言嘅人学语言嘅方法。

主持人发现每个人嘅学习方法都唔一样，

有啲人用睇电影嘅方法学语言，

有啲人用同其他人倾计嘅方法学语言，

有啲人用记单词嘅方法学语言。

虽然每个人嘅方法都唔一样，

但系佢发现每个人都好中意自己学语言嘅方法，

学语言本身系一件枯燥嘅事，

只有揾到自己中意嘅一种学习方法，

你先可以一直坚持落去。

其实冇最好嘅学习方法，

只系有最中意，同最啱自己嘅学习方法。

如果你中意睇视频，

咁你可以每日睇十分钟广东话视频，

如果中意听歌，

咁你可以每日听十分钟广东话歌，

如果你中意倾计，

咁你可以每日同一个朋友讲十分钟广东话，

如果你实在冇特别中意嘅学习方法，

咁你可以每日听十分钟学广东话嘅录音。

要学好广东话，

你要做嘅就系揾到自己中意嘅学习方法，

然后培养一个每日学广东话嘅习惯。

如果你中意我嘅文章，欢迎关注微信公众号“我要学广东话”。

你可能想看：

如果觉得《慢速粤语听力：如何才能学好粤语？》对你有帮助，请点赞、收藏，并留下你的观点哦！